Tula Para sa Earth Hour Binigkas una noong March 27, 2010

Kumbakit Nagpipikit Ako ng mga Mata

ni Reuel M. Aguila

Minsan, tinanong ng aking kuya,

sa probins'ya, noong

kami’y mga bata pa,

kung bulag na ba daw s’ya;

nang pinatay na ang gasera

wala s’yang makita.

Walang matatandang nakatugon

maliban sa hanging may ibinubulong,

at mga kuliglig na waring may hinihimig.

Mayamaya pa’y pati mga mata’y

nasanay sa dilim. Sa dilim

higit na maningning ang mga bituin.

Ilang dekada na iyon; at gayong

pareho na kaming nagsasalamin,

ano’t higit nahihirapang aninagin

ang mga bituin

ng mga nagdaan;

nakakasilaw ang mga ilaw

ng kasalukuyan;

at ang liyab ng mga dagitab

ay sapat nang makapambulag.

Wala lang.

Mayroon lang mga alaala

na marahil ay mahalaga

o may aral; ewan. Di ko matantya

kumbakit higit akong nakakakita

sa pagpikit ng mga mata;

at higit na lumiliwanag ang pananaw

kung pinapatay ang mga ilaw.

(Unang binigkas para sa Earth Hour, 27 Marso 2010;

8:30 – 9:30 n.g., oras sa Pilipinas; sa resto na Pen-pen na pag-aari nina Chupsie Medina)

Nauna ring ilathala sa blog na ito.. paki silip po dito noong Marso 28, 2010.